სრულიად საქართველოს კათოლიკოს-პატრიარქის მოსაყდრის, სენაკისა და ჩხოროწყუს მიტროპოლიტ შიოს ლოცვა-კურთხევით და წმინდა ალექსი შუშანიას სახელობის მართლმადიდებლური სკოლა-გიმნაზიის ორგანიზებით, დიმიტრი ჯაიანის სახელობის მოსწავლე-ახალგაზრდობისა და კულტურის ცენტრში, სენაკისა და სრულიად საქართველოს მფარველის, დიდი მწიგნობრისა და ასკეტი ბერის, წმინდა ალექსი სენაკელის აღსრულებიდან 101-ე წლისთავთან დაკავშირებით, ღირსი მამის ცხოვრებისა და შემოქმედებისადმი მიძღვნილი ლიტერატურულ-მხატვრული საღამო გაიმართა.
ღონისძიებას, რომელიც სკოლა-გიმნაზიის დირექტორის, ნინო ჯანჯღავას მისალმებით გაიხსნა, სასულიერო პირები, სენაკის მუნიციპალიტეტის საკრებულოს თავმჯდომარე, საბა ოდიშარია, სენაკის მუნიციპალიტეტის მერის პირველი მოადგილე, ბადრი ქუთელია, საკრებულოს თავმჯდომარის პირველი მოადგილე, ლევან უჩანეიშვილი, მერიის განათლების, კულტურის, სპორტისა და ახალგაზრდობის სამსახურის უფროსი, გივი მისაბიშვილი, სენაკის საგანმანათლებლო რესურსცენტრის უფროსი, დარეჯან ზარანდია, ადგილობრივი თვითმმართველობის, საგანამანათლებლო სექტორისა და საზოგადოების წარმომადგენლები ესწრებოდნენ.
საღამოზე, წმინდა ბერის სახელობის მართლმადიდებლური სკოლა-გიმნაზიის მოსწავლეებმა, თეატრალიზებული ფორმით წარმოადგინეს, მწიგნობარი ბერის ცხოვრებისა და მოღვაწეობის მნიშვნელოვანი ეტაპები, ნაწყვეტები პუბლიცისტური წერილებიდან და პოეტური შემოქმედების ნიმუშები.