სენაკის მერი სპორტულ ინფრასტრუქტურულ სამუშაოებს გაეცნო

,,სპორტი და ახალგაზრდული პოლიტიკა, ჯანსაღი ცხოვრების წესის დამკვიდრება, ახალგაზრდებში მისი პოპულარიზაცია და შესაბამისი ინფრასტრუქტურული მზაობა ჩემი საქმიანობის და ჩვენი გუნდის ერთ-ერთი მთავარი პრიორიტეტია.

მაქსიმალურად უნდა შევუწყოთ ხელი ახალგაზრდებს, რომ ჯანსაღი ცხოვრებით და სპორტით დაკავდნენ. მათ შორის, ბევრი იქნება ისეთიც, ვინც პროფესიულ სპორტში შეძლებს წარმატებების მიღწევას“ – აღნიშნა სენაკის მუნიციპალიტეტის მერმა, ვახტანგ გადელიამ.

ამ ეტაპზე, მუნიციპალიტეტში, რეგიონული განვითარებისა და ინფრასტრუქტურის სამინისტროს დაფინანსებით და მუნიციპალიტეტის მერიის თანადაფინანსებით, სპორტული ინფრასტრუქტურის მოწყობა-რეაბილიტაციის პროექტების ფარგლებში, მინი სპორტული მოედნები, თეკლათში – გოლასკურის უბანსა და ნოქალაქევში – გახომელას უბანში ეწყობა.

დამონტაჟდება ხელოვნურსაფარიანი მოედნები, კალათბურთის ფარები, გარე განათების სისტემა, შემოღობვის კონსტრუქციები და სხვა;

მიმდინარე სამუშაოებს, საერთო ღირებულებით – 215 512 ლარი, შპს ,,მენათი“ ასრულებს.

თეკლათსა და ნოქალაქევს, განახლებული, კეთილმოწყობილი მინი სპორტული მოედნები, მიმდინარე წლის ივნისის თვის ბოლოს შეემატება.

სპორტული მოედნის მოწყობის სამუშაოები ასევე მიმდინარეობს ქალაქის ცენტრალური სტადიონის ტერიტორიაზე.

2023 წელს, სპორტული ინფრასტრუქტურის მოწყობა-რეაბილიტაციის ფარგლებში, სენაკის მუნიციპალიტეტის მერიამ, 3 მინი სპორტული მოედანი მოაწყო – ვაჩნაძის ქუჩაზე , ყოფილი მე-8 სკოლის მიმდებარედ და მშვიდობის ქუჩაზე, ახალრეაბილიტირებული მეოთხე საბავშვო ბაღის მიმდებარედ; ტრენაჟორები დამონტაჟდა ჭავჭავაძის ქუჩაზე.