სენაკის მერია 16 ახალგაზრდას სასწავლო კურსს დაუფინანსებს

მერიის სხდომათა დარბაზში, კომისიამ, რომელსაც სენაკის მუნიციპალიტეტის მერის მოადგილე, ნანა ზარანდია ხელმძღვანელობს, შემადგენლობით – მერიის განათლების, კულტურის, სპორტისა და ახალგაზრდობის სამსახურის უფროსი, გივი მისაბიშვილი; ნეო უნივერსიტეტის ,,Skillwill “ სტუდენტთა წარმატებაზე ზრუნვის გუნდის ხელმძღვანელი, მაია მჟავანაძე, სენაკის მუნიციპალიტეტის მერის თანაშემწე, ნიკოლოზ ქეცბაია; ახალგაზრდობისა და კულტურის მიმართულებით – განათლების, კულტურის, სპორტისა და ახალგაზრდობის სამსახურის სპეციალისტი, გვანცა მალანია, აპლიკანტებთან გასაუბრება გამართა.

20 თებერვლიდან, სენაკის მუნიციპალიტეტის მერია, 16 ახალგაზრდას პროფესიული განვითარების უნიკალურ შესაძლებლობას აძლევს და სრულად დაუფინანსებს Skillwill-ის ციფრული მარკეტინგისა და პროგრამირების კურსებს, რაც მათ საშუალებას მისცემს, მიიღონ თანამედროვე ტექნოლოგიური განათლება და დაიწყონ მაღალშემოსავლიანი კარიერა.

პროექტის ფარგლებში, 2023-2026 წლების ახალგაზრდული პოლიტიკის კონცეფციის შესაბამისად, ახალგაზრდების დასაქმებისა და პროფესიული განათლების განვითარების ხელშეწყობის მიზნით, 2024 წელს, სენაკის მუნიციპალიტეტის მერიამ, 30 სენაკელ ახალგაზრდას, სრულად დაუფინანსა IT ტექნოლოგიებისა და პროგრამირების კურსები.