შეხვედრა ვაქცინაციისა და სკრინინგის პროცესის დეტალებზე

ვაქცინაციისა და სკრინინგის პროცესის მიმდინარეობის დეტალებზე, დღეს, სენაკის მუნიციპალიტეტის მერი, ვახტანგ გადელია, საზოგადოებრივი ჯანდაცვის სახელმწიფო პროგრამებისა და რეგიონული მართვის დეპარტამენტის სამეგრელო–ზემო სვანეთის განყოფილების უფროსს, ანზორ ქობალიას, ცენტრის წარმომადგენელს, ნანა ბებიას და სენაკის მუნიციპალიტეტის საზოგადოებრივი ჯანდაცვის ცენტრის დირექტორს, ანა ჭიჭაღუას შეხვდა.

იმუნიზაციის სახელმწიფო პროგრამის ფარგლებში, საქართველომ შეიძინა 200,000 დოზა ფრანგული წარმოების ოთხკომპონენტიანი ვაქცინა VaxigripTetra (SANOFI WINTHROP INDUSTRIE) – ერთ-ერთი იმ ვაქცინებიდან, რომელსაც ჯანდაცვის მსოფლიო ორგანიზაცია (WHO) რეკომენდაციას აძლევს. ვაქცინა მორგებულია იმ გრიპის შტამებზე, რომელთა ცირკულაციაც მოსალოდნელია მიმდინარე სეზონზე.

საზოგადოებრივი ჯანდაცვის ცენტრი, სენაკის მუნიციპალიტეტის მერიის მხარდაჭერით, ადგილობრივი მოსახლეობისთვის რეგულარულად ატარებს ვაქცინაციისა და უფასო სკრინინგის აქციებს.

ვაქცინაცია და სკრინინგი ასევე მიმდინარეობს 6 სამედიცინო დაწესებულებასა და 15-ვე ადმინისტრაციული ერთეულის საექიმო ამბულატორიაში. ამ დროისთვის ვაქცინირებულია 1 084 მოქალაქე.

დამატებითი ინფორმაციისთვის დარეკეთ დაავადებათა კონტროლისა და საზოგადოებრივი ჯანმრთელობის ეროვნული ცენტრის ცხელ ხაზზე: 116 006