შეხვედრა რეგიონის საჯარო სკოლების მოსწავლეთა მშობლებთან

შეხვედრის მონაწილეებს მინისტრმა ზოგადი განათლების სისტემის რეფორმის ძირითადი მიმართულებები გააცნო და განსახორციელებელი ინიციატივები მათთან ერთად განიხილა.

საუბარი შეეხო სხვადასხვა აქტუალურ საკითხს. მათ შორის: სასკოლო ფორმას, სახელმძღვანელოების ხარისხის გაუმჯობესებას, სკოლებში ჯანსაღი გარემოს უზრუნველყოფას, პირველკლასელთა რეგისტრაციას, საგანმანათლებლო ინფრასტრუქტურასა და სასკოლო ცხოვრებაში მშობლების ჩართულობას.

შეხვედრა კითხვა-პასუხის რეჟიმში წარიმართა და მშობლებს შესაძლებლობა ჰქონდათ, მათთვის საინტერესო საკითხებთან დაკავშირებით მინისტრისგან მიეღოთ ამომწურავი ინფორმაცია.

შეხვედრაში ასევე მონაწილეობდნენ სახელმწიფო რწმუნებული სამეგრელო-ზემო სვანეთის მხარეში დავით ვერავა, განათლების, მეცნიერებისა და ახალგაზრდობის მინისტრის მოადგილე ზვიად გაბისონია, ფოთის, სენაკისა და ხობის დელეგატი გიორგი ხახუბია, სენაკის მუნიციპალიტეტის მერი ვახტანგ გადელია და სენაკის საკრებულოს თავმჯდომარე ჯუმბერ ტყებუჩავა.