18 წელი რუსეთ-საქართველოს ომიდან

რუსეთის სამხედრო აგრესია დასავლეთ საქართველოს მასშტაბით განსაკუთრებით მძიმედ სენაკს შეეხო. სენაკის მეორე ქვეითი ბრიგადის ბაზისა და ქალაქის დაბომბვის შედეგად დაიღუპნენ სამხედრო მოსამსახურეები და სამი მშვიდობიანი მოქალაქე – მეირა ინჯგია, ჯონი ქარდავა და როლანდ ქარდავა. ცხინვალის მისადგომებთან, ქვეყნის ტერიტორიული მთლიანობისათვის ბრძოლაში, გმირულად დაეცნენ მეორე ქვეითი ბრიგადის კაპრალები – თემურ ბოკუჩავა და ლევან თეფანია.

დღეს, აგვისტოს ომში დაღუპულთა ხსოვნის მემორიალი გვირგვინებით შეამკეს სენაკის მუნიციპალიტეტის მერმა ვახტანგ გადელიამ, საკრებულოს თავმჯდომარე ჯუმბერ ტყებუჩავამ, მათმა მოადგილეებმა, დაღუპულთა ოჯახის წევრებმა, ადგილობრივი თვითმმართველობისა და საზოგადოების წარმომადგენლებმა.

წმინდა იოანე ნათლისმცემლის სახელობის საკათედრო ტაძარში დეკანოზმა იოანე კუპრეიშვილმა აგვისტოს ომში დაღუპულთა სულების მოსახსენებელი პანაშვიდი გადაიხადა.

მოსწავლე-ახალგაზრდობისა და კულტურის სახლის მიმდებარე ამფითეატრში, სენაკის მუნიციპალიტეტის მერიის განათლების, კულტურის, სპორტისა და ახალგაზრდობის სამსახურის ორგანიზებით, საქართველოს სტუდენტური პარლამენტისა და მთავრობის ჩართულობით, აგვისტოს ტრაგიკული დღეებისადმი მიძღვნილი თემატურ-დოკუმენტური ღონისძიება – „ცრემლიანი მარიამობისთვე“ გაიმართება.