Georgian
English
27 სექტემბერს, სოხუმის დაცემის დღესთან დაკავშირებით, სენაკში საქართველოს ტერიტორიული მთლიანობისთვის ბრძოლაში დაღუპულთა ხსოვნას პატივი მიაგეს.
სენაკის მუნიციპალიტეტის მერმა ვახტანგ გადელიამ, აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველმა მოადგილემ გურამ მისაბიშვილმა, მერის მოადგილეებმა, საკრებულოს თავმჯდომარე ჯუმბერ ტყებუჩავამ და საკრებულოს თავმჯდომარის მოადგილეებმა საქართველოს ეროვნული გმირების, ჟიული შარტავასა და გურამ გაბისკირიას ბიუსტები ყვავილებით შეამკეს.
ადგილობრივი ხელისუფლებისა და აფხაზეთის ავტონომიური რესპუბლიკის მთავრობის წარმომადგენლები ეკლესიაში გამართულ პანაშვიდსაც დაესწრნენ, რომელიც აფხაზეთის ომში დაღუპულთა სულების მოსახსენიებლად აღევლინა.
27 სექტემბერი საქართველოს უახლესი ისტორიის ერთ-ერთი უმძიმესი დღეა. ამ დღეს პატივს მივაგებთ ყველა იმ ადამიანის ხსოვნას, ვინც საქართველოს ერთიანობისა და ტერიტორიული მთლიანობისთვის ბრძოლას შეეწირა.