სენაკის მერი კონფერენციას დაესწრო

როგორც ღონისძიებაზე სიტყვით გამოსვლისას ვახტანგ გადელიამ აღნიშნა, სახელისუფლებო გუნდის ერთ-ერთი უმთავრესი მიზანია, ხელი შეუწყოს ახალგაზრდების სრულფასოვანი განვითარებისათვის შესაბამისი გარემოს შექმნას.

,,შექმნის დღიდან, საქართველოს სტუდენტური პარლამენტის და მთავრობის სენაკის წარმომადგენლობა აქტიურად არის ჩართული ადგილობრივი თვითმმართველობის გადაწყვეტილებების მიღების პროცესში, კულტურულ, ახალგაზრდულ, საგანმანათლებლო და შემეცნებით აქტივობებში. ჩვენთვის ახალგაზრდების ხედვები მნიშვნელოვანია, იმისათვის, რომ მაქსიმალურად სწორად განვსაზღვროთ მომავალი თაობისთვის საჭირო სტრატეგია. სწორედ ამ მიზნით, ჩვენ ვაგრძელებთ შედეგზე ორიენტირებულ კომუნიკაციას ახალგაზრდების საკეთილდღეოდ“, – განაცხადა ვახტანგ გადელიამ.

საქართველოს სტუდენტური პარლამენტისა და მთავრობის სენაკის წარმომადგენლობა გასულ წელს სენაკის მუნიციპალიტეტის მერიისა და საკრებულოს მხარდაჭერით, შეიქმნა და 200-ზე მეტ სენაკელ ახალგაზრდას აერთიანებს.

კონფერენციაზე ახალგაზრდებმა გაწეული საქმიანობის ანგარიში წარადგინეს. აღინიშნა, რომ შექმნიდან დღემდე წარმომადგენლობამ მონაწილეობა მიიღო 70-მდე თემატურ აქტივობაში. წარმომადგენლობის ინიციატივით გაიმართა ევროსაბჭოს მოდელირებული სხდომები, საინფორმაციო-შემეცნებითი პრეზენტაციები, ინტელექტუალური თამაშები, მარათონები და შეხვედრები მუნიციპალიტეტში მოღვაწე სხვადასხვა სფეროს ღვაწლმოსილ წარმომადგენლებთან.

კონფერენციას ასევე დაესწრნენ სენაკის მუნიციპალიტეტის საკრებულოს თავმჯდომარის მოადგილეები, ეპარქიის სასულიერო პირები, საგანმანათლებლო რესურსცენტრის უფროსი, ადგილობრივი თვითმმართველობისა და საზოგადოების სხვადასხვა სფეროს წარმომადგენლები.