Georgian
English
2023 წლიდან, სენაკის მუნიციპალიტეტის მერია, აუტისტური სპექტრის მქონე მოზარდების განვითარების ხელშეწყობის, სოციალური ინტეგრაციის გაუმჯობესებისა და ოჯახების გაძლიერების მიზნით, აუტიზმის სპექტრის დარღვევის მქონე ბავშვთა რეაბილიტაციის პროგრამას ახორციელებს.
პროგრამის მთავარი მიზანია – მოზარდებში შემეცნებითი და სოციალურ-ემოციური უნარების განვითარება, ასევე, თვითმოვლისა და დამოუკიდებელი ფუნქციონირების უნარების ჩამოყალიბება.
პროგრამა თავის მხრივ მოიცავს – საჭიროების შემთხვევაში, მულტიდისციპლინური გუნდის რამდენიმე სპეციალისტის მიერ, ინდივიდუალური განვითარების წლიური გეგმის შესაბამისად, კომპლექსური თერაპიის მიწოდებას.
ამასთანავე, შეზღუდული შესაძლებლობების მქონე პირთა მხარდაჭერის პროგრამის ფარგლებში, მთელი საბიუჯეტო წლის განმავლობაში, სენაკის მერია, აუტიზმის სპექტრის მქონე მოზარდებს უწევს ინდივიდუალურ ფინანსურ დახმარებას.
2024 წლიდან, პროექტის – „საჭიროების მქონე ბავშებისთვის ADOS -ის კვლევის დანერგვა მუნიციპალიტეტში“ – ფარგლებში, რისკის მქონე მოზარდებისთვის, მუნიციპალიტეტში, ხელმისაწვდომი გახდა ,,ოქროს სტანდარტად“ აღიარებული ADOS -ის კვლევის ადგილზე ჩატარება, დიაგნოზის დროული დასმა და მკურნალობა/რეაბილიტაციის დაწყება.
მიმდინარე წელს, აუტიზმის სპექტრის დარღვევის მქონე ბავშვთა რეაბილიტაციის პროგრამის ბიუჯეტი გაიზარდა და 210 000 ლარს შეადგენს.
პროგრამით 50 მოზარდი სარგებლობს.
ადგილობრივი თვითმმართველობის საქმიანობის უმთავრესი პრიორიტეტია, სპეციალური საჭიროებების მქონე ადამიანებისთვის სრულფასოვანი ცხოვრებისა და საზოგადოებასთან ინტეგრაციის საუკეთესო პირობების შექმნა.
