,,გავიცნოთ ჩვენი ქალაქის წარმატებული ახალგაზრდები“ – ლიკა კორსავა

რუბრიკის – ,,გავიცნოთ ჩვენი ქალაქის წარმატებული ახალგაზრდები“ ფარგლებში, 15 წლის წარმატებულ სენაკელ ახალგაზრდას, ლიკა კორსავას გაგაცნობთ:

სენაკის მუნიციპალიტეტის ხელოვნების ცენტრის სამუსიკო სკოლის საორკესტრო (ვიოლინო) განყოფილების წარჩინებული მოსწავლის მუსიკალურ კარიერაში ახალი ეტაპი დაიწყო: ლიკა სწავლას ევგენი მიქელაძის სახელობის თბილისის ცენტრალურ სამუსიკო სასწავლებელში გააგრძელებს.

15 წლის ასაკში, ლიკა კორსავა რესპუბლიკური და საერთაშორისო კონკურსების, ფესტივალების მრავალგზის ლაურეატი, გრან-პრის და არაერთი საპატიო ტიტულის მფლობელია: სენაკის მუნიციპალიტეტის მერიის დაფინანსებით, მან მონაწილეობა მიიღო თურქეთის ქალაქ სიდეში გამართულ ახალგაზრდა მუსიკოს-შემსრულებელთა საერთაშორისო კონკურს-ფესტივალში, სადაც ორჯერ მოიპოვა პირველი პრემია და ლაურეატის წოდება.

წარმატებულ სენაკელ მოზარდს არაერთი მიღწევა და ტიტული აქვს მოპოვებული: ლიკა კორსავა არის ბავშვთა და მოზარდთა რესპუბლიკური ფესტივალ-კონკურსის – ,,იპოვე შენი ვარსკვლავი“ გრან-პრის მფლობელი, ბენიამინო ჯილის სახელობის კლასიკური მუსიკის საერთაშორისო ფესტივალ-კონკურსის პირველი პრემიის მფლობელი და კონკურსის ლაურეატი, ქართული მუსიკის IX ეროვნული კონკურსის პირველი ადგილის მფლობელი და კონკურსის ლაურეატი, ასევე, კლასიკური მუსიკის მე-17 ეროვნული კონკურს-ფესტივალის ,,მომავლის ვარსკვლავები“ – III პრემიის მფლობელი და ეროვნული კონკურსის ლაურეატი, ბახის სახელობის მე-7 ეროვნული კონკურსის II პრემიის მფლობელი, ბავშვთა და მოზარდთა ხალხური შემოქმედების XXX საერთაშორისო ფესტივალის ლაურეატი, ბავშვთა და მოზარდთა XV რესპუბლიკური ფესტივალ-კონკურსის – ,,იპოვე შენი ვარსკვლავი“ II ადგილის მფლობელი და ფესტივალის ლაურეატი, საერთაშორისო კონკურსის – ,,ჰარმონია’’ – პირველი ადგილის მფლობელი და კონკურსის ორგზის ლაურეატი.

ხელოვნების ცენტრს, ლიკა კორსავას და პედაგოგ შორენა ზვიადაძეს ვულოცავთ მორიგ აღიარებას და შემდგომ წარმატებებს ვუსურვებთ.