ჯვრის თაყვანისცემის დღე, ხსოვნისა და იმედის დღე საქართველოში!

დღეს, საქართველოს უახლესი ისტორიის ერთ-ერთი ტრაგიკული დღეა – სოხუმის დაცემიდან 30 წელი გავიდა…

30 წელი გავიდა საქართველოს ეროვნული გმირის, სენაკის საამაყო შვილის, ჟიული შარტავას გმირული დაღუპვიდან…

სოხუმის დაცემის დღეს, აფხაზეთის უზენაესი საბჭოს თავმჯდომარე, ჟიული შარტავა, 30-მდე ქართველთან ერთად დახვრიტეს.

ამ სასტიკ ომს შეეწირნენ ჩვენი ქალაქის ღირსეული შვილები, ჩვენი დროის, საქართველოს ეროვნული გმირები – გენო დამია, გურამ გაბესკირია, ნოდარ კანკია.

,,…არასოდეს, სანამ ცოცხალი ვარ…“ – ეს იყო გურამ გაბესკირიას უკანასკნელი სიტყვები, როცა ის, მთავრობის დატყვევებულ წევრებთან და მათ თანმხლებ პირებთან ერთად, პარლამენტის შენობიდან გამოიყვანეს და დაჩოქება უბრძანეს…

გენო ადამიამ, შეიარაღებული კონფლიქტის დაწყების პირველივე დღიდან, მოხალისეები შემოიკრიბა. ის თანამებრძოლებთან ერთად ბოლომდე იბრძოდა.

სოხუმის დაცემის შემდეგაც კი უარი თქვა დანებებაზე და მცირე ძალებით ცდილობდა ბრძოლას.

1993 წლის 28 სექტემბერს, გენო ადამია კოდორის ხიდთან მაშინ მოკლეს, როცა სოხუმში შესვლას ცდილობდა.

1993 წლის 2 ივლისს, ე. წ. „ტამიშის ოპერაციის“ დროს, მძიმედ დაჭრილმა ნოდარ კანკიამ შენიშნა, რომ მტერი უახლოვდებოდათ და მეგობარს მისი დატოვება უბრძანა: ,, შენ ჩემზე ახალგაზრდა ხარ და არ უნდა მოკვდეო…”

ბატალიონის სხვა წევრებიც ცდილობდნენ ნოდარისთვის დახმარების აღმოჩენას და დაჭრილი თანამებრძოლის სამშვიდობოზე გაყვანას, მაგრამ

ნოდარმა ბრძოლის ველი არ დატოვა…

მან თავი აიფეთქა და მტრის 12 მედესანტე გაანადგურა.

გმირების ქალაქის წიაღში აღზრდილი ჩვენი საამაყო მამულიშვილების გმირობა დიდი ზნეობრივი მაგალითია მომავალი თაობებისთვის!

მხოლოდ ერთობაშია ხსნა! ჩვენ აუცილებლად დავიბრუნებთ ერთმანეთს!

ჯვართამაღლებას გილოცავთ!

ვახტანგ გადელია

სენაკის მუნიციპალიტეტის მერი