სენაკში, სასკოლო თეატრალური ოლიმპიადა დაიწყო

თეატრალურ ფესტივალში, რომელიც მეორე წელია ტარდება, წელს, 12 საჯარო სკოლა და ახალგაზრდული თეატრი მიიღებს მონაწილეობას – ქალაქ სენაკის გენო ადამიას სახელობის პირველი, ჟიული შარტავას სახელობის მე-2 , მე-3, მე-7, გეჯეთის, ქვემო ფოცხოს, თეკლათის, ნოქალაქევის, კოტიანეთის, უშაფათის, ჩოხატაურის მუნიციპალიტეტის სოფელ ამაღლების საჯარო სკოლების თეატრალური დასები და ზესტაფონის მუნიციპალიტეტის კულტურისა და შემოქმედების ცენტრთან არსებული ახალგაზრდული თეატრ-სტუდია ,,მართვე’’.

ოლიმპიადის საზეიმო გახსნას, თეატრალები – აკაკი ხორავას სახელობის პროფესიული სახელმწიფო დრამატული თეატრის წამყვანი მსახიობები: თამარ აბშილავა-კობახიძე და ლადო კოკაია უძღვებოდნენ.

გახსნის ცერემონიალს, სენაკის მუნიციპალიტეტის მერიის განათლების, კულტურის, სპორტისა და ახალგაზრდობის სამსახურის უფროსი, გივი მისაბიშვილი, სენაკის საგანმანათლებლო რესურსცენტრის უფროსი, ელისო შურღაია, ადგილობრივი თვითმმართველობის, თეატრალური, საგანმანათლებლო სფეროებისა და საზოგადოების წარმომადგენლები ესწრებოდნენ.

ოლიმპიადის მნიშვნელობაზე ისაუბრეს და მონაწილეებს წარმატებები უსურვეს: იოანე ნათლისმცემლის სახელობის საკათედრო ტაძრის წინამძღვარმა, დეკანოზმა იოანე კუპრეიშვილმა, სენაკის საგანმანათლებლო რესურსცენტრის უფროსმა, ელისო შურღაიამ.

მაყურებელთა წინაშე წარდგნენ: სენაკის მუნიციპალიტეტის ხელოვნების, მოსწავლე-ახალგაზრდობისა და კულტურის ცენტრების შემოქმედებითი ჯგუფები, ფოლკლორის სახელწიფო ცენტრის სენაკის სალოტბარო სკოლა, ანიმატორები, ინდივიდუალური შემსრულებლები.

ოლიმპიადის ფარგლებში, სასკოლო თეატრალური დასები მაყურებლისთვის, ქართველი მწერლებისა და პოეტების ნაწარმოებების მიხედვით დადგმულ 12 სპექტაკლს აჩვენებენ, სადაც დასწრება თავისუფალია.

სასკოლო ოლიმპიადის დაარსებისა და ჩატარების მთავარი მიზანი კულტურის, განათლებისა და თეატრალური ხელოვნების პოპულარიზაცია, თეატრალურ ცხოვრებაში მეტი მოზარდის ჩართვა და ნიჭიერი ახალგაზრდების აღმოჩენაა.

სასკოლო ჯგუფებს გადაეცემათ დიპლომები.

გამოვლინდება გრან-პრის მფლობელი სპექტაკლი, ასევე – ნომინანტები, რომლებიც დიპლომებით და სპეციალური პრიზებით დასაჩუქრდებიან.

თეატრალური ფესტივალი 5 მაისს საზეიმოდ დაიხურება.