სენაკში ბოშათა დღე აღინიშნა

აღნიშნულ თარიღთან დაკავშირებით, დღეს, გენო ადამიას სახელობის პირველ საჯარო სკოლაში, ღონისძიება გაიმართა.

პირველ საჯარო სკოლაში სამი ბოშა სწავლობს.

ღონისძიებას სენაკის მუნიციპალიტეტის მერი, ვახტანგ გადელია, საკრებულოს თავმჯდომარე, საბა ოდიშარია, მერის პირველი მოადგილე, ბადრი ქუთელია, საგანმანათლებლო რესურსცენტრის უფროსი, დარეჯან ზარანდია, ადგილობრივი თვითმმართველობის, საგანმანათლებლო სექტორის და საზოგადოების წარმომადგენლები დაესწრნენ.

აქტივობა, საქართველოს განათლების, მეცნიერების და ახალგაზრდობის სამინისტროს პროგრამის – ,,განათლების მიღების მეორე შესაძლებლობა სოციალური ინკლუზიით“ , ფარგლებში ჩატარდა.

პროგრამის კოორდინატორია – პირველი საჯარო სკოლის მენტორი მასწავლებელი, ელისო შურღაია.

პროგრამის ფარგლებში, სკოლაში, ხელგარჯილობის და კითხვის კლუბები ფუნქციონირებენ, რომელთაც პედაგოგი – მამუკა კუჭავა და მსახიობი – ნოდარ მელაძე ხელმძღვანელობენ.

თემატურ საღამოზე შესრულდა ბოშური ცეკვები, სიმღერები; ასევე ჩატარდა ვიქტორინა – ,,ვინ იცის ბოშური ენა?’’, გაიმართა პრეზენტაციები – ცნობილ ბოშებზე, ეთნიკური ჯგუფის ისტორიასა და ადათ-წესებზე.

ღონისძიების დასასრულს, პედაგოგები და მოსწავლეები, საქართველოს განათლების, მეცნიერების და ახალგაზრდობის სამინისტროს სიგელებით დაჯილდოვდნენ.