შეხვედრა პროგრამის – ,,მერები ეკონომიკური ზრდისთვის“ ფარგლებში

სენაკის მუნიციპალიტეტი, საქართველოს 10 მუნიციპალიტეტს შორის, პროგრამაში – „ფინანსებისა და ინვესტიციების მოზიდვის მზაობის აკადემია“ – მონაწილეობის მისაღებად შეირჩა.

შეხვედრას საქართველოს რეგიონული განვითარებისა და ინფრასტრუქტურის მინისტრის მოადგილე, მზია გიორგობიანი, რეგიონული განვითარებისა და ინფრასტრუქტურის სამინისტროს, ევროკავშირის, განვითარების პროგრამისა და პროექტში შერჩეული მუნიციპალიტეტების წარმომადგენლები ესწრებოდნენ.

ევროკავშირი და გაეროს განვითარების პროგრამა, რეგიონული ინიციატივის „მერები ეკონომიკური ზრდისთვის“, M4EG, ფარგლებში, მიზნობრივ სწავლებასა და დახმარებას სთავაზობენ შერჩეულ მუნიციპალიტეტებს მათი ფინანსური მზადყოფნის უზრუნველყოფისთვის.

პროგრამაში მონაწილეობის შედეგად, მუნიციპალიტეტები მიიღებენ ამომწურავ ინფორმაციას დაფინანსების არსებულ შესაძლებლობებზე, მოამზადებენ კონკურენტულ საპროექტო იდეებსა და საინვესტიციო წინადადებებს, ასევე შეძლებენ თანხვედრაში მოიყვანონ მათ ხელთ არსებული ფინანსური და საინვესტიციო მექანიზმები.

ევროკავშირთან დაახლოების გზაზე, დინამიური, გონივრული და წარმატებული ადგილობრივი განვითარება უდიდეს როლს ასრულებს. ამ მხრივ, საკვანძო მნიშვნელობა ენიჭება მუნიციპალიტეტების მზაობას სრულყოფილად გამოიყენონ დაფინანსების შესაძლებლობები და ევროკავშირში არსებული ფინანსური და საინვესტიციო ინსტრუმენტები.